Aruelu.com > Cultura 23 xunu 2012
Google punxo en marcha’l Proyeutu de Llingües en Peligru d’Estinción, una plataforma onde podrá atopase y compartir información sobre idiomes que cuerren peligru de desaniciu
Dientro del estáu español inclúin trés llingües: l’aragonés, l’asturianu y la llingua de signos catalana. Google señala al primeru d’ellos como’l que s’atopa nuna situación más vulnerable. Na páxina del asturianu pueden colgase yá conteníos na nuesa llingua.
El buscador asegura que gracies a esti proyeutu, van poder documentase les más de 7.000 llingües de tol mundu que tán a puntu de desapaecer, col fin de caltener la diversidá, honrar les conocencies de los nuestros mayores y arriquecer el futuru de la mocedá.
La tecnoloxía puede collaborar nestes metes, al dexar que se creen grabaciones d’alta calidá de los postreros falantes d’un idioma, conectar comunidaes esvalixaes al traviés de los medios sociales y facilitar l’aprendizaxe d’idiomes, espliquen dende Google.
Google intervieno nel desenvolvimientu y llanzamientu del proyectu, pero’l so oxetivu al llargu plazu ye que tomen el mandu espertos nel campu del caltenimientu llingüísticu. Nos próximos meses, va dar el relevu el First People’s Cultural Council (FPCC) y The Institute for Language Information and Technology de la Eastern Michigan University, quien se van encargar del proyectu.
RSS 2.0
5 Mensaxes del foru
07:56
Pa sacala d’esi pozu nun hai más remediu que forciar al gobiernu y a los partíos parllamentarios sacante IX, a declarar la oficialidá del asturianu.
Responder a esti mensaxe
12:53
Google tien más xacíu y más sensibilidá pa col asturianu que’l "nuesu" gobiernín.
Responder a esti mensaxe
16:58
Tamos a tiempu de llograr la oficialidá y algamar una xuba de falantes per aciu d’ella. Trabayar ensin desmayu pola normalización social ye la clave.
Responder a esti mensaxe
18:39
¿Pero esti artículu nun ye del añu pasáu? Güel un poco a mugor.
Responder a esti mensaxe
07:36
L’asturianu salvaráse del desaniciu col esfuerciu de los falantes. Naide va regalanos la oficialidá del nuesu idioma.
Responder a esti mensaxe