Aruelu.com > Asturies > Centru 18 abril 2012
Avilés
Compromisu por Avilés, nome dáu a la coalición Bloque por Asturies- UNA- LV-GV nesi conceyu, asoleyó un comunicáu valorando los resultaos de les eleiciones asturianes del pasáu 25 de marzu. Darréu apurrímosvoslo íntegru
Anque la convocatoria del 25-M pudiera garrar a contrapié a les formaciones de carácter nacional que concurrieron, al tar nel mediu de procesos internos, nun hai que facer munches reflexones sobre los resultaos d’estes últimes elecciones y cualquier reflexón que se faiga va ser aplicable a cualquier convocatoria previa. Lo que caracteriza a la izquierda nacional asturiana ye que nun s’alcuerda de trabayar na cai hasta los quince díes primeros de cada convocatoria y si nun tienes protagonismu nos medios y nun trabayes la cai, poca base social va poder movilizase porque simplemente, ésta nun existe. Asina, dende’l paecer de Compromisu por Avilés, nun caben sides nin llectures que nun pasen por asumir el fracasu total que supunxo’l 25-M pa la izquierda nacional asturiana y d’ehí que debiere suponer un puntu d’inflexión que tien que rematar nun procesu de reconstrucción de la mesma.
Dende Compromisu por Avilés, entiéndese que nel momentu hestóricu nel que nos alcontramos, necesítense midíes hestóriques y éstes pasen por asumir responsabilidaes pol bien del País. Asina, queremos abrir un debate ente militantes y simpatizantes del movimientu asturianu d’izquierdes, que permita la rexeneración nos plantegamientos y estratexes a siguir nel futuru. Darréu, queremos exponer el camín que se tendría que siguir según la nuestra visión.
Compromisu por Avilés entiende que too partíu políticu tien que ser una ferramienta válida p’algamar un fin y que dende’l puntu de vista del nacionalismu d’izquierda, non solo nunca se llegó a esi fin, sinón qu’en munches ocasiones foron y son les propies siegles, el fin de munches batalles internes, quedando los intereses nacionales al marxen. Poro, toles ferramientes que lleva usaes el nacionalismu asturianu hasta’l día de güei, yá tán caduques, siendo necesariu pa la izquierda asturiana abrir un nuevu y únicu camín. Asinamesmu y empatando colo anterior, muncho s’oyó falar de rexeneración política nes últimes convocatories asturianes y si bien yera necesariu nesi intre, va siendo hora qu’esi cuentu vaya aplicándose dientro de la izquierda nacional asturiana. Ye necesariu ser responsables y dexar pasu a xente nuevo, xente que nun tea contaminao nin envenenao poles continues batalles personales qu’endolquen al nacionalismu asturianu dende l’añu 1991 y qu’aporte idees nueves. La construcción d’esta nueva alternativa tien que ser lo más abierta, plural y flexible posible dende’l so xermen, buscando dende’l primer momentu la suma del mayor númberu de fuercies.
D’otramanera, la izquierda nacional siempre pecó de “paracaidismu” dientro del nuesu país, tanto a nivel electoral como na participación nos movimientos sociales. Ye difícil pensar nun conflictu social nel que la izquierda nacional fora la vanguardia y non un movimientu “parasitariu” que llega a la manifestación de turnu cola pancarta recién fecha. Asina, entendemos que toles estratexes basaes en crear estructures a nivel nacional, tamién tán agotaes, teniendo en cuenta tanto la incapacidá de ser operativos en tolos conceyos, como nos nulos resultaos.
Dende Compromisu por Avilés, propónse trabayar na construcción nacional asturiana dende la base, que pal nuesu paecer, han de ser los conceyos, ensin refugar a presentar candidatures nes sucesives convocatories nacionales. Hai que centrase n’organizase autónomamente nos conceyos nos qu’anguañu hai xente anque seya de forma residual y participar activamente na vida socio-política de los mesmos, creando espacios de confluencia y articulándose como un brazu políticu útil pa tolos movimientos cívicos asturianos.
Per otra banda y como se dicía más p’arriba, l’apostar pol trabayu nos conceyos, nun tien que tar reñíu, nin muncho menos, cola coordinación de trabayu ente los conceyos y la organización d’un referente d’izquierda asturiana nes cites electorales d’ámbitu nacional. Esta coordinación d’acción, taría venceyada a una Asamblea Xeneral de Conceyos de carácter como pocu semestral y que taría formada por un representante de cada conceyu.
Teniendo claro, qu’hai qu’afondar muncho más nos temes trataos, éstes son les llinies xenerales que pa Compromisu por Avilés tien que seguir la izquierda nacional asturiana nel camín de la so necesaria refundación y coles que queremos abrir un procesu de debate ente tolos axentes, que nos lleve a bon puertu pa entamar a trabayar cuanto primeru.
N’Avilés, 13 d’abril de 2012.
RSS 2.0
4 Mensaxes del foru
18:30
Debe ser la primera vez que lleo un comentariu autocríticu d’una formación nacionalista asturiana. Agradezse lleer un análisis fechu dende la realidá y non dende la inopia.
Responder a esti mensaxe
11:09
Coincido dafechu con ET. Ye curioso qu’un exerciciu tan anómalu d’autocrítica nun xenere más comentarios. Cincante al conteníu de la declaración na mio opinión habría delles coses que matizar o incompletes o coles que nun taría d’alcuerdu al cien por cien, pero en llinies xenerales el diagnósticu ye acertáu, y dígolo con plenu conocimientu de causa, dende’l puntu de vista de daquién que tuvo nel interior del movimientu y nun lu conoz solo de lleer páxines web. Poro, soi pesimista de que determinaos "cabezaleros" seyan capaces de chase pa un lláu o polo menos collaborar n’anovar esto, unos por ansia de protagonismu y otros por mera incapacidá política, que son los más.
En tóu casu, norabona a la xente d’Avilés por estes reflesiones, por faceles públiques y pola sinceridá y honradez que desprenden. El día qu’otros tengan el valor d’actuar de xeitu asemeyáu entamarán a ganar credibilidá.
Munchos ánimos y munchu aguante, el qu’otros nun tuvimos, pa camudar les coses, que bona falta fai.
Responder a esti mensaxe
13:19
Ya fai munchísimos comentarios que dixi que teníemos que camudar d’estratexa y de cabezaleros, y por ello dalgunos punxeronme pingando. Agora tan calláos. Soi d’ izquierdes pero reconozo qu’ Asturies necesita un partíu nacionaliegu de centru capaz d’ axuntar toles sensibilidaes asturianistes y alloñáu de los estremismos que tantu mal faen a la causa. Repito lo dicho munches veces. Agora ya podéis poneme verde.
Responder a esti mensaxe
14:50
La coxuntura ye crítica pa Asturies. Agrávase’l desempléu en tol Estáu, xusto nel momentu nel qu´el nuesu país asturianu va vese sometíu a una nueva fase d’aniquilación paisaxística, identitaria y ecolóxica. Los grandes proxeutos socialistes d’ampliación del puertu d’El Musel, los xeneradores eólicos, la incineradora, la regasificadora, etc. son, nel so conxuntu, un atentáu contra la identidá ecolóxica de la mio nación.
La identidá d’una nación ye un sistema complexu de traces que definen una comunidá humana qu’habita y tresforma de manera estable un territoriu.
Una d’eses traces ye l’idioma. La Llingua Asturiana lleva 30 años de represión. En contra de los mandatos constitucionales y de les requisitories europees, los socialistes, y los sos perrinos falderos, IX, son los que ponen la so bota en Asturies, con sofitu masivu de votos d’asturianos, y son los más acérrimos enemigos d’esti preséu y cimientu básicu pa la identidá d’un pueblu, la llingua. El PP Y Foro Asturies siguen na mesma llínea de favorecer la aculturación del País. La situación del asturianu ye pre-democrática onde quiera que la mire.
Otra traza, non menos importante, consiste na agresión contra los nuesos seculares vezos de vida y asentamientu sobre’l territoriu. La Asturies verde y paradisíaca ta convirtiéndose nel mayor basureru medioambiental d’Europa. Y esto, dempués de camudar al país n’unu de los mayores asilos d’obreros y llabradores n’edá granible, un asilu de xente ensin futuru, retirada per vía de decretu de toa actividá granible.
¿Qué va tener que ver la llingua asturiana y l’identidá ecolóxico y étnico d’un país?
Senciellu. Dambes traces fáennos ser, a los asturianos, lo que somos. Una nación, quiciabes una de les más conducentemente reprimíes y neutralizaes de toa Europa. Cuando un visitante entra nel país, el paisaxe ufiértase-y distintu al d’España: los güeyos dícen-ylo. La otra vía sensorial d’entrada vien dada polos oyíos: los acentos, les llingües. Mal que –yos pese a los colonizadores anti-asturianos, PPSOEIU, n´Asturies inda falamos y escribimos nuna llingua que nun ye la del so maraviyosu imperiu español. Asturies sigue siendo distintu polos güeyos y los oyíos. Esti colonialismu español sábelo, y por eso repite’l mantra: “n´Asturies nun hai futuru pal nacionalismu…”. Dícenlo mil veces a la selmana a ver si alloña al so Satán. Pero los mesmos nacionalistes asturianos suicídense nun formando un Partíu propiu, estremándose en milenta sigles risibles, importando ideoloxíes foranes, retardando les reivindicaciones identitaries y dexándose remanar pol puercu xuegu del PSOE-IX, de los que son marionetes (equí llamámoslos “comunistes del bable y la giata”)
La ideoloxía predominante en Asturies ye un nacionalismu tamién, nacionalismu español, l’únicu que, según piensen la “Piel de Toru” y l’España de Secanu, nun ye peligrosu.
Nun pueden negalo. Y tampoco pueden negar los nuesos dominadores qu’equí nun somos un apéndiz de Castiella nin de Galicia, como quixeren ellos, los supuestos internacionalistes” de la esquierda plural (incluyendo a los asturcomunistas del bable y la gaita). Esa esquierda de la Federación Socialista Asturiana y d’Izquierda Xunida qu’inda canta ritualmente “La Internacional” pa mayor gloria d’un capitalismu selvaxe.
¿Tien que ver la defensa d’una llingua y la defensa d’un paisaxe?
Enforma: tien que ver cola identidá d’una nación. Dambos, llingua y paisaxe, son elementos de máximu cuidáu y desvelu pa los nacionalistes ensin estáu. Esmoleznos qu’haya tantu enfotu en borrar lo que nos estrema. Somos distintos, y eso ofiende a los detenten el poder. Una esquierda que llogra ventayes provincianes no qu’atañe a dar y conceder puestos y contratos a deu, en detrayer comisiones llegales ya illegales dende un despachu, qu’engata verticalmente nel escalafón del ésitu social a cuenta de barrer horizontalmente les diferencies qu’el so propiu pueblu caltuvo frente a los centralismos homoxeneizadores.
Y agora vien el paru y la crisis económica. La situación va agravar nes mases populares. Fai falta desallugar a estos nefastos xestores que, amás, aniquílennos como pueblu y condergaron a Asturies a un paralís granible, a ser el cero a la izquierda.
Porque ye precisu dicilo en voz alto: nun nos gobierna una esquierda. Apodéranos un CERO A la izquierda.
Ente esi cero a la izquierda, por bien “plural” que se nos vienda (IX y PSOE son, sustancialmente, lo mesmo), y un conservadorismu derechiegu, non menos cerriscu nel so enfotu españolizador (PP-Foru), namá caben una unión de tolos asturianos qu’aspiren a algamar un mayor respetu y dignidá a la so llingua propia (oficialidá del asturianu y del eonaviego) y un mayor autogobiernu que dexe al país tomar les sos propies determinaciones, dexando de ser colonia d’un Madrid ineficiente, llonxanu y ayenu a nueses mesmes posibilidaes de desenvolvimientu.
Tamos naguando por que se construya un Partíu Nacional Asturianu, plural y non dogmáticu, que tenga capacidá de formar una estructura estable por tol país, y qu’acueya como amigos a tolos ciudadanos y colectivos que faigan frente a les fuerces retrógrades, grises y colonizadores, esto ye, un frente contra les sucursales españoles o madrilanes (PSOE-PP-FORO—UPYD- IX-gaiterobableros), un frente a favor de Asturies y del pueblu.
Responder a esti mensaxe