Emilio Ballesteros esplicó a los candidatos que la so intención dende’l momentu nel que llegó a l’alcaldía foi "abrir el conceyu al pueblu y devolver la so xestión al mesmu, consiguiendo que tolos vecinos pudieren vese representaos y sintieren que tienen voz y votu, non solo nes urnes, sinón nel restu de la llexislatura", y plantegar una xestión empobinada pola austeridá, la tresparencia y l’humildá. Ballesteros comentó con Palacios y Huergo el proyectu de puesta en marcha de les xuntes vecinales y el proyectu de presupuestu participativu, pa consiguir implicación na xestión del conceyu.

Pela so parte Rafa Palacios comento que "la democracia participativa ye un procesu que precisa formación ya información y l’austeridá ye imprescindible pa que los vecinos y vecines vean que ye posible otra forma distinta de faer política, verdaderamente al serviciu de la ciudadanía.". Por ello, el candidatu a la presidencia afirmó que nel programa de la coalición que representa propónse suprimir tolos privilexos de los cargos públicos al respective de años de cotización, xubilación etc. y el cambéu del Códigu Penal pa establecer la non prescripción de los delitos de malversación, confechu, prevaricación, tráficu d’influencies, sobornu y estorsión, cola derogación de la inmunidá xudicial venceyada al cargu".

Pela so parte Yolanda Huergo afirmó que "ún de los puntos del nuesu programa ye l’aprobación d’una nueva Llei de Función Pública que garantice que la imparcialidá ya independencia de los funcionarios tien de ser garantizada, daqué que nun-y interesó al PSOE nel so momentu y que nun interesa a Cascos agora, pero que ye imprescindible p’asegurar una calidá democrática mínima, que se base nel méritu y la capacidá, y non na llibre designación"