Roberto Holgado, conceyal na Casa Conceyu de Carreño pola coalición de Bloque-UNA, presentó´l actu definiendo la candidatura como una apuesta decidida pola unidá, y el pactu de la izquierda asturianista y verde como la ferramienta necesaria nestos momentos.

Na so intervención Yolanda Huergo señaló que “Tener que venos equí güei ye la preba de que la política asturiana perdió’l rumbu va bien de tiempu”. Huergo calificó de “Infantil, patéticu y vergoñoso” lo visto na Xunta Xeneral los caberos meses amás de señalar que viendo los cartelos eleitorales de les fuerces mayoritaries nada fai albidrar que se vaya facer daqué estremao nel futuru. La númberu dos tamién dixo qu´el compromisu col país de la coalición nun naz del oportunismu o´l cinismu, sinón de munchos años de trabayu na defensa de los intereses d´Asturies y la so xente. Yolanda Huergo finó diciendo qu´esta convocatoria eleitoral ye un pasu más “pa seguir afitando la construcción de l´alternativa”.

Peslló l´actu la intervención de Rafael Palacios, númberu unu de la llista central y candidatu a la Presidencia d´Asturies. Palacios destacó la inoperancia de la lexislatura, que calificó de “añu perdíu nel que nun fueron capaces nin siquiera de facer un presupuestu”. Afondó nesta idea al decir que “les fuerces polítiques de la Xunta Xeneral namás se ponen d´alcuerdu pa lo que-yos beneficia. Sólo hai que ver que nun son capaces nin d´aconceyase pa situaciones como l´amenaza de pieslle d´Arcelor n´Asturies.”

Escontra esta realidá, el candidatu quiso destacar el calter d´alternativa real de la candidatura. “Ente les tres formaciones que componen esta coalición, sumamos más de 10.000 votos en mayu del añu pasáu. Queremos ser aquellos que condicionemos les polítiques nesti país, pa lo que necesitamos tener representación”. Rafael Palacios reafirmó´l compromisu de la candidatura cola educación y la sanidá pública, los servicios sociales y la defensa decidida d´un futuru dignu pa la cultura y la llingua asturiana.” Tamién quiso destacar “el calter ecoloxista y de defensa de los derechos de los animales reforzáu cola presencia de Los Verdes- Grupu Verde na coalición”

Rafael Palacios finó la so intervención pidiendo´l sofitu “a tolos que nun se resignen a la situación actual y quieren que se camuden les polítiques que sufrimos agora mesmu”.