Lo mesmo que na cita eleitoral de mayu de 2011, les organizaciones asociaes Bloque por Asturies y UNA, a la que nesta ocasión xunióse Los Verdes-Grupu Verde, escoyeron como númberu 1 de la llista de la circunscripción central, y polo tanto candidatu a la Presidencia d’Asturies, a Rafael Palacios y como segundu puestu na mesma llista a Yolanda G. Huergo, que ye amás coportavoz de la coalición.

La coalición destacó que nes llistes presentaes -nes que repiten munchos de los candidatos y candidates de les elecciones de va un añu con delles nueves incorporaciones- esiste una amplia presencia de colectivos y persones representatives de la esquierda, l’asturianismu, l’ecoloxismu y los movimientos sociales asturianos.

En mayu de 2011 la coalición eleitoral taba formada por Bloque por Asturies y UNA, y nesta ocasión incorporóse a la mesma Los Verdes-Grupu Verde, una formación qu’en mayu de 2011 concurrió en solitariu y que refuerza agora’l componente ecoloxista y animalista de la propuesta electoral de la coalición.

Les 3 organizaciones ratificaron el so apueste por un cambéu fondu na política asturiana en clave asturianista, d’esquierdes y ecoloxista, que defenda ensin medies tintes los intereses de la mayoría social y del país, que cunte colos movimientos sociales y que tenga un proyectu p´Asturies non sucursalista.

La coalición quier igualmente rescamplar cola so presencia nestes eleiciones el nulu respetu que les fuerces parlamentaries asturianes tienen pola ciudadanía que representen,dando un espectáculu políticu únicu polo llamentable, y destacar la oportunidá que supon la candidatura de Bloque por Asturies-UNA-LV-GV pa espresar col votu’l refugu a les polítiques d’axuste antisociales de los distintos gobiernos asturianos (antes PSOE-IU, agora FAC, que’l so compromisu con Asturies resultó ser inesistente) y los gobiernos españoles del PSOE y del PP, pa castigar a quienes anteponen los intereses partidistes a los d’Asturies; y pa sofitar una alternativa que defenda la construcción d’una sociedá basada nel desenvolvimientu de la democracia participativa, que respuenda a los intereses de la mayoría social y del país.