Los Verdes piden un amenorgamientu del impautu de l’autovía en Valdés

Los Verdes d’Asturies sofiten la denuncia de los vecinos de l’asociación Río de la Olla, de la collación de Santiago (Valdés) pa que l’autovía del Cantábricu, al so pasu por esa collación, cause’l mínimu impautu ambiental.

Poro considerase necesariu que’l trazáu de l’autovía vaya por esa rasa costera por debaxu del nivel del suelu, en trinchera, en vez d’elevada varios metros como tá angüaño prevista y n’execución.

Esti trazáu en trinchera, según sorrayen los vecinos, "causaría menos impautu ambiental, afectaría menos a les esplotaciones ganaderes y facilitaría la permeabilidá de l’autovía".

"Les nueves autopistes son una fonte de contaminación sonora perimportante, cosa que nun suel tener en cuenta al diseñase; da fecho, el tráficu ye la principal fonte de ruíu, polo que deben adoptase toles previsiones posibles pa minimizalu, en beneficiu de les persones y animales que viven alrodiu. Poro, estes infraestructures constituyen importantes barreres que fragmenten y rompen la cadarma del territoriu, polo que toa midida que tienda a cohesionalu tien de ser implementada", sorrayen los ecoloxistes.

Numberosas vecinas y vecinos de la collación concentranse al lláu de les obres tolos miércoles a les 16 horas y tán poniendo en marcha numberoses iniciatives en distintos ámbetos pa camudar el proyeutu.

Dende Los Verdes confien en que les sos reivindicaciones seyan atendies lo enantes posible pol Ministeriu de Fomentu.