Cultura formigona’l camín de Santiago na cuesta de El Cantu

Formigonar el vieyu camín de Santiago ente Bustio y Colombres ye’l nuevu atropellu contra’l patrimoniu cultural asturianu de la conseyera de Cultura, la socialista Mercedes Álvarez. La conseyería de Cultura ye titular nos medios de comunicación pola falta de sensibilidá contra too lo que tenga que ver cola nuesa cultura.

Va unos dies destituyó al direutor del Museu Etnográficu de Grandas de Salime, José Naveiras Escanlar, ensin avisu con "premeditación y alevosia", nomando a un nuevu direutor, arqueólogu de profesión pero con un curriculum faltu de conocimientos de calter etnográficu. El grupo de sofitu a Pepe "El Ferreiro", como nomen al ex-direutor del museu tien angüaño más de 7.000 amigos pidiendo la so readmisión nel citáu museu, anque IU adelantose ufriendo a Pepe’l cargu designáu por IU nel Conseyu de Patrimoniu Cultural del Principáu d’Asturies, dependiente de la Conseyería de Cultura.

Na Sierra de Carondio nestos dies, tamién autorizó xunto a medioambiente’l pasu de máquines p’asitiar molinos éolicos por una zona de gran interes arqueolóxicu pola esistencia de diferentes túmulos funerarios milenarios, amás de diferentes zones d’interes cultural recoyies nes cartes arqueolóxiques.

La so falta de respetu pa col nuesu patrimoniu demuestrase col métodu pa "protexer" el vieyu camín de Santiago, dende la conseyería sorrayen que " Cola finalidá de protexer los restos del empedráu orixinal del Camín, Cultura adoptó una solución consistente nel esbroce, llimpieza del tarrén y posterior saneamientu y prescribióse la instalación d’un geotextil de separtación y una capa de sable de diez centímetros, colo que garantizase la pervivencia del empedráu".