Camudamos pa bien

De magar entamó la web “Pola Xuntanza” delles coses camudaron abondo nos discutinios políticos del nacionalismu astur. Entamemos va unos meses dientro d´un ambiente gafu, casi fedientu, onde los navayazos verbales mozcaben l´estilu foreru. Una dixebra xudicial ente los nacionalistes d´esquierda paecía una torga insalvable pa poder falar de xuntura en serio, más alló de la utopía inxenua. Inxenuos, desinformaos, “virtuales”, de too nos cayó, quiero recordar, nos diagnósticos anónimos iniciales que ficieron de nós. Los más elegantes de nuesos críticos dicíen que teníemos bona intención pero qu´había arcanos perfondos que se nos escapaben…¿Arcanos? Tontaes.

Pero tamién tuvimos sofitos, sofitos morales, blogues qu´espardieron la idea, xente que mos escribió con ánimos. Y aneciemos n´esto de la Xuntanza.

Agora nun quiero tirar les campanes al altu. Préciome, de tola vida, de ser persona prudente. El camín que s´anició nun ye llanu y allegre. Ye un camín llargu y abegosu. Les torgues son, en principiu, difíciles: “Propietarios” de sigles y micropartíos que callen, que tán afogaos nun silenciu sepulcral. Formaciones a les que-yos cuesta camudar “el chip” y malamente lleguen a la sociedá. Conformismu col estáu de la custión, yá sía en condición de paniaguaos, yá sía en condición de “cabeza de mur”, un mur que va ser barríu ceo pol rau del lleón, el lleón españolista.

Nun quiero tirar les campanes al vuelu, pero toi feliz de que l´alderique esista na rede. Ye la plataforma embrionaria pa que depués esquite esi mesmu alderique a la sociedá (anque la rede tamién ye “sociedá” mal que-yos pese a dellos medios dixitales autistes y micropartíos inmovilistes). Quiciás tea próximu´l saltu a aconceyar cara a cara, aconceyar ente los más partidarios de la xuntanza que vivan n´Asturies… Pero de mano, el qu´esista alderique seriu, respetuosu y el que s´afale una cultura de trabayu a comuña ente tolos nacionalistes asturianos ensin distinción ye bono. Ye, en si mesmo, una cosa saludable. El méritu ye de toos, de munchos, de los que taben en casa fartos del cainismu y, al ver un espaciu abiertu, pudieron entrar a plantegar esti tema en serio. Yá nun se pue dicir que ye “cosa d´un blog o dos”. Eso ye tener mal sangre. L´alderique ta ehí y nun se pue negar, y tampocu va escosar.

¿Una Xuntanza electoral? Eso son pallabres mayores. Pero hai que la facer. Yá ye muncho lo qu´avancemos solo dende internet, apurriendo manes y abrazos a toos pa ver si salimos de la situación colonialista. Yá lo dixo Xurde Blanco: tenemos un Gobernín colonialista y de tricorniu. El tiempu urxe, esa ye la custión. Paez mui abarullao facer un Frente Nacional Asturianu apriesa, pal 2011, pero ye que yá más baxo nun pudimos cayer. L´estrozu identitariu y ecolóxicu (que pa min van mui xuntos) nun pue ser mayor. Creo qu´hai que ser imaxinativos, y creo que les bases y los independientes tienen que “arreblagar” pencima de determinaos Gurús que, agora, nun abren la boca nin mueven un deu pa esa Xuntanza tan necesaria. Ye tiempu pa siguir siendo rebeldes. Unos en primer fila, otros dende´l gallineru, pero toos clamiando ¡Xuntanza! Dexando de llau a esos Gurús que tán demostrando nun valir pa nada, salvo p´alimentar so ego.

Lo más normal pa dellos ye pensar que nun va haber xuntanza pal 2011, xuntanza electoral, anque sí se ve qu´hai ganes d´algamar pautos de xunidá d´aición, trabayu n´andecha, formación d´un Frente estratéxicu conxuntu…Esto cabero creo que sí lo va haber, creo que nun hai quien lo apare. Pero la Xuntanza electoral, amás de too ello, yo veola necesaria, estructurando de mena formal esi Frente: hai qu´apostar otra vez fuerte. Dir pel camín difícil: “pontear” a los propietarios de sigles y executives, dar voz a los desmovilizaos y dar ruíu: meter un ruíu tremendu na sociedá pa face-yos saber qu´hai una alternativa al Réxime, al bipartidismu, al mangonéu de la “izquierda plural”. En cuantes supieran munchos asturianos que nun somos namás “que los del bable”, sinón que somos la solución p´Asturies, yá nun hai guettos nin guettes. Tendremos consiguío entós la Normalización del Nacionalismu Asturianu. Creo que´l reló cuerre que se mata, y qu´hai que dar pasos alantre. Al pie d´esti artículu volverán a dicime que me calle, que nun tengo nin idea, que toi fuera d´Asturies y poro nun tengo drechu a nada, y que soi malapenes un ciber-nacionalista. Val: pero yo falo lo que falo porque me da la gana. Préstame ver qu´en sitios como Aruelu o Pola Xuntanza la xente yá ta diciendo lo que-y da la gana. Un pasu mui grande ye dexar que´l nacionalismu dexe de tar secuestráu y fuera de guettos. Yá nun tenemos que callar.

Pola Xuntanza.

Del blog de Carlos X. Blanco