Entrevista a Xuventú Asturianista

Xuan Pandiella, voceru de Xuventú Asturianista

Xuventú Asturianista ye una asociación de xóvenes asturianos preocupaos por Asturies que ta agregada al Partíu Asturianista (PAS), siendo les sos mocedaes, pero que tien funcionamientu independiente.

¿Cuálos son los oxetivos cimeros de Xuventú Asturianista?

El trabayu dignu y l’accesu a la vivienda de los mozos y moces d’Asturies nel so país, p’acabar cola marcha forciada de los xóvenes a otros llugares y poles ayudes a los pequeños emprensarios mozos, emprendedores y creadores d’emplegu. La meyora del sistema educativu en tolos ámbitos y la inclusión de la llingua asturiana como vehícular en tolos niveles, asina como la creación d’un Grau de Filoloxía Asturiana. Afalar les llibertaes individuales (mui mancaes n’Asturies pol clientelismu creáu pol PSOE), los drechos ciudadanos y la igualdá de les persones ente elles y énte les lleis.

Amás, queremos algamar p’Asturies una autonomía máxima, d’alcuerdu colos drechos hestóricos del nuesu país, ún de los primeros estaos d’Europa, conservando y afalando’l conocimientu de la nuesa cultura y de les nueses tradiciones en toles sos espresiones. Naguamos tamién pol cuidáu del patrimoniu natural d’Asturies, pola meyora del mediu ambiente y pol fomentu de les industries non contaminantes, amás de pola conservación de la nuesa fauna y pol fin de cualesquier tortura sobre animales. Como nun podía ser d’otra manera, esto ye imposible ensin la oficialidá del asturianu, la so dignificación y normalización total na sociedá, refugando les invasiones culturales qu’esisten anguaño énte la falta d’acción nesti campu del Gobiernu d’Asturies.

Como organización moza, trabayamos tamién por una mayor participación de la mocedá asturiano na vida política asturiana.

Xuventú Asturianista ñaz a la par que’l PAS y ye’l coleutivu de mocedá de calter nacionalista más vieyu del país ¿cuála ye la xera, en llinies mui xenereales, desendolcada fasta la fecha?

El PAS cumple en 2010, 25 años siendo un referente del asturianismu políticu, y la Xuventú Asturianista, que nun lleva tantos años, pero que como vien diz, ye’l colectivu mozu más vieyu del país, trabaya dende va munchos pa camudar la situación del país, y n’especial de la mocedá asturiano. La nuesa xera principal ye sofitar y enanchar l’actividá d’Unión Asturianista, de la que caltenemos la nuesa independencia de criteriu, pero que ye al mesmu tiempu, la fuercia que creemos pue camudar, cola so entrada nes instituciones, el cambiu na situación de la mocedá asturiano.

¿Qué opinión tien Xuventú Asturianista del gobiernu asturianu?, ¿Qué se necesita meyorar?

El Gobiernu d’Asturies ye cásique dende los entamos de la democracia un despropósitu, un nefastu xestor y una traxedia p’Asturies poles consecuencies de les sos acciones sobre la xente d’esti país. Esto tien muncho que ver cola so falta d’apreciu pa con Asturies, que munches vegaes nun ye pa ellos más qu’un trampolín p’hacia otros campos políticos. Los socialistes, en gran parte, nun conocen el país, nun tienen apegu poles sos señes d’identidá y lo único que-yos vieno importando foi caltenese nel poder a cualesquier preciu, cosa que ficieron mui bien y que supieron iguar con una bona rede clientelar, que ye mui difícil de valtar, pero que ye responsabilidá de los partíos asturianos, desaniciar.

Destacaríemos dos cuestiones, dientro del nefastu llabor del gobiernu socialista: La economía (y l’emplegu), que vieno cuesta abaxo n’Asturies en toos estos años (sacante’l periodiodu del pactu del PAS col gobiernu de Marqués) y la política cultural ya identitaria, onde se pue ver a les clares la falta d’apegu y hasta l’odiu a lo propio que tienen los dirixente socialistes ¿asturianos?.

La reforma del Estatutu ta parada nel actual escenaríu políticu, ¿que tien d’afitase na viniente reforma del Estatutu d’Autonomía d’Asturies?

L’Estatutu d’Autonomía ye una ferramienta básica de trabayu, pero nun soluciona nengún problema per se, sinón que marca unes llinies de lo que ye o tien de ser el país. N’Asturies va muncho que los partíos centralistes decidieron que nun díbemos a ser una autonomía, sinón una provincia, y de segunda. Decidiéronlo diendo pela conocida "vía lenta" nel desenrrollu estatutariu, escaeciendo cuestiones elementales nel mesmu, renegando de les nueses señes d’identidá, etc.

Na Xuventú tenemos delles coses clares: l’Estatutu ha recoyer el máximu techu competencial posible, la oficialidá del asturianu, etc. Y creemos qu’esti Estatutu nuevu tendría d’aprobase nun referendu, dándo-y la voz a la ciudadanía, qu’hasta agora nun la tuvo pa votar el so documentu fundamental. Ensin escaecer que con un Estatutu "ideal", la xestión pue siguir siendo igual de mala si los que la dirixen son los que lo ficieron hasta agora.

Apocayá roblaba’l PAS un pautu con Andecha Astur pa desenrollar los puntos de trabayu en común, ¿cómo se vio eso dende Xuventú Asturianista?

Los esfuercios del PAS pola xunidá del asturianismu vienen de vieyo. El Partíu Asturianista caltuvo alcuerdos con cásique toles fuercies del espectru asturianista a lo llargo de los sos 25 años de vida, demostrando qu’en dalgunos casos, esta xunidá pue ser mui útil pa los asturianos. El casu más importante ye’l del pactu permanente con URAS, que llamamos Unión Asturianista y que permitió que güei cuntemos con más d’una decena de conceyales y dos alcaldíes, Ponga y Villaviciosa, anque nel ámbitu nacional entá nun se dieren los resultaos deseaos por toos. Sicasí, les dos fuercies demostraron un sacrificiu importante en favor de los intereses de los asturianos y esto recompensose siendo, con muncha diferencia, la fuercia política asturiana más importante con 13.338 (el 2,2%).

El pactu con Andecha Astur vémoslu de forma mui positiva, como tolo que suponga pasos alantre na xunidá d’aquellos a los que-yos esmolez la situación d’Asturies. Apoyaremos tolos pasos que’l partíu dea nesi sen.

La primer aición, y única hasta güei, fecha de mancomún con Darréu foi’l pidimientu de la oficialidá de les seleiciones asturianes, ¿qué otres actividaes conxuntes se puen esperar nun futuru?

El pactu con Andecha Astur ye un alcuerdu abiertu que permite la collaboración en tou momentu y n’aquellos temes nes que les formaciones tengan postures averaes. El pasu principal que se dio con esti documentu ye abrir pontes, llugares de diálogu y alderique ente les dos fuercies. L’actualidá política dirá marcando les futures acciones a comuña ente les fuercies.

¿Interesa la llingua asturiana y la defensa de les señes d’identidá propies a la mocedá asturiano?

Tamos convencíos de que sí. Ye un tema importante pa la mocedá d’Asturies y eso espéyase na cantidá de rapazos qu’estudien asturianu nes escueles, de la xente mozo que participa del movimientu asturianista en toles sos estayes, etc. Sicasí, les condiciones sociopolítiques, les idees que sobre la nuesa llingua se difunden nes escueles y dende’l Gobiernu d’Asturies y munchos conceyos, la invisibilidá de los asturfalantes na sociedá, etc. nun favorecen la creación d’una conciencia llingüística tolo importante que nos gustaría y qu’acabe por valtar de la Xunta Xeneral a los que traten al pueblu asturianu con tantu despreciu.

La emigración de la mocedá asturiano, el paru, la falta de vivienda, ¿qué soluciones aporta Xuventú Asturianista a la mocedá asturiano?.

Dende Xuventú Asturianista creemos qu’un Gobiernu d’Asturies condicionáu por Unión Asturianista, sedría quien a consiguir repitir los resultaos que nel periodu del gobiernu de Marqués, que pactaba presupuestos col PAS, se consiguieron. Esto nun supón tar dientro d’esi Gobiernu, sinón concidicionar presupuestos, polítiques, etc dende fuera, como yá se fizo nel pasáu. El problema d’entrar al gobiernu ye que dempués yes reu de les sos polítiques y responsable de lo que se faiga en tol executivu, non namás nes tos competencies. Lo que nun se pue facer ye xugar a ser oposición y gobiernu, como fizo Izquierda Xunida-BpA nos años últimos, porque tas engañando a los asturianos.

Si mos ponemos a falar de cuestiones más concretes, lo que ta claro ye que la política económica que llevó alantre dende va trenta años el PSOE, y en dellos momentos IX, si ye que pue llamase "política económica", foi nefasta p’Asturies. Nin consiguieron caltener les vieyes industries d’Asturies, nin crear nueves col suficiente puxu como pa sustituyir los puestos que diben perdiéndose pola mor de la so nefasta xestión. Lo único que supieron foi dexar a una montonera de xente en casa, cola complicidá de los sindicatos, y con un sueldu desproporcionáu del que viven munches families, ¿pero qué pasa cuándo s’acaben estes perres?. Parte d’eses perres tenía que se tener invertío nel so momentu pa crear les condiciones afayadices pal desenrrollu económicu d’Asturies, lo mesmo que los fondos mineros, y tantos y tantos recuersos desaprovechaos o marafundiaos polos gobiernos socialistes.

Los gobiernos nun creen empleos (sacantes el funcionariáu), nin deben convertise n’empleadores, sinón qu’han crear les condiciones afayadices pa que la economía funcione ensin grandes sobresaltos nin problemes. Faciéndolo asina, darréu terminen el paru, la falta vivienda, la emigración...

¿Qué rellaciones tien Xuventú Asturianista con otros coleutivos político-sociales d’Asturies? ¿Y de fuera les nueses llendes?

Xuventú Asturianista caltién rellaciones cola sociedá asturiana, y ta presente nos Conseyos de la Mocedá principales, anque entendemos qu’en munches ocasiones la participación nos mesmos nun ye más que face-yos el xuegu a los partíos centralistes, que controlen, al traviés d’asociaciones paraleles, estes organizaciones. En cuantes a les asociaciones del esterior d’Asturies, d’otros naciones y estaos, siguimos con interés les sos actividaes, anque entendemos que la mocedá asturiano tien les sos característiques y tenemos de siguir el nuesu propiu modelu d’actividá, ensin despreciar les bones idees que pueden aportanos, y la solidaridá común que caltenemos con otros movimientos asemeyaos al asturianista.

Son delles les voces nel asturianismu políticu que nagüen pola xuntanza de los diferentes actores políticos col enfotu d’algamar meyores resultaos electorales, ¿qué opina Xuventú Asturianista nesti asuntu? ¿ye posible alcuerdos ente les diferentes organizaciones de mocedá asturianes (Fai!, Darréu, Bloque de Mocedá Asturianista, UNA-Mocedá, Sofitu, CMC,..), p’algamar oxetivos comunes?

Nun somos nós los que ponemos pilancos a estes xuntaces... El PAS pactó yá nel pasáu cola UNA, IAS, AA, URAS... y la Xuventú siempres sofitó estes iniciatives, y va siguir faciéndolo nel futuru. Los alcuerdos con otres mocedaes son posibles, por supuestu, anque nun sé si ye lo que quieren eses organizaciones. La cuestión ye si anteponemos la cuestión identitaria y lo que nós calificamos d’"emerxencia nacional" que vive Asturies, o cuestiones de supuestes orientaciones a la esquierda o a la drecha, que nós vemos dafechu obsoletes. Si pa toles fuercies de mocedá, solucionar los problemes d’Asturies ye lo primero, creemos que se podrán facer coses, sinón, los esfuercios sedrán inútiles.

Los conceyos son la base de la cadarma d’Asturies, ¿cuálu ye’l vuesu llabor nel tarrén municipal?

Unión Asturianista ye la fuercia asturiana con más conceyales, y cunta con dos alcadíes, como yá dicíemos enantes. Dientro d’estos conceyos trabayamos pa que se faigan les polítiques de mocedá que marquen los nuesos oxetivos cimeros.

Col actual escenaríu políticu de fragmentación partidista, ¿ye posible unos alcuerdos de mínimos que finen cola xuntanza de los diferentes partios políticos nuna futura plataforma electoral asturiana nel 2011?. Desplicái los motivos.

Esto vien a ser asemeyao a lo yá dicho: esto depende de les prioridaes de cada fuercia política. Nós vémoslo posible, si les prioridaes de toos coinciden d’una manera xeneral. Pero dalgo asina nun se fai a última hora, porque entós ye tarde. De toes formes, nun coincidimos del too nesa visión d’un escenariu políticu de fragmentación, dende va más de cinco años esiste una plataforma qu’axunta a los dos partíos con más votos d’ente los asturianos, ye Unión Asturianista, y ye dende’l nuesu puntu de vista un exemplu de trabayu a comuña, llegando a alcuerdos, faciendo por atopar puntos en comúm, sacrificándose por dar una respuesta a los problemes d’Asturies.

Espaciu pa dicir lo que vos preste o dalguna cosa que consideréis importante atalantar.

Falta nel asturianismu políticu un componente d’autocrítica, que nós queremos facer, y ye que si nun se llega a les instituciones, nun ye namás polos pilancos puestos dende’l poder (qu’esisten) y a vegaes dende’l propiu movimientu asturianista, sinón porque nun se saben vender les idees de la forma más afayadiza, creemos que porque munchos nun tomen en serio’l llabor políticu, sinón como una afición, un entretenimientu, cuando’l serviciu públicu ha ser un oficiu sacrificáu y continuu. Amás, nun se pue pelear dende l’estraparllamentarismu coles mesmes ferramientes que los partíos del poder, porque entós van salir siempres ganando. Como David contra Goliat, hai que saber usar les ferramientes comunicatives necesaries pa valtar al gobiernu, que nun siempres han ser les mesmes qu’usen ellos. Queden munches coses por facer pa llegar a los asturianos, y ye esi trabayu continuu lo que pue camudar la situación del país. Pero’l tiempu pa les próximes elecciones ye yá mui curtiu, ye’l momentu d’entamar.

- Entrevista al Bloque de la Mocedá Asturianista